* 'O mare

'O mare fa paura".
Accussì dice 'a ggente
gardanno 'o mare calmo,
calmo cumme na tavula.
E dice 'o stesso pure
dint' 'e gghiurnate 'e vierno
quanno 'o mare
s'aiza,
e l'onne saglieno
primm' a palazz' 'e casa
e po' a muntagne.
Vergine santa...
scanza 'e figlie 'e mamma!

Certo,
pè chi se trova
cu nu mare ntempesta
e perde 'a vita,
fa pena.
E ssongo 'o primmo
a penzà ncapo a me:
"Che brutta morte ha fatto stu pover'ommo,
e che mumento triste c'ha passato".
Ma nun è muorto acciso.
E' muorto a mmare.
'O mare nun accide.
'O mare è mmare,
e nun 'o sape ca te fa paura.

Io quanno 'o sento...
specialmente 'e notte
quanno vatte 'a scugliera
e caccia 'e mmane...
migliara 'e mane
e braccia
e ggamme
e spalle...
arraggiuso cumm'è
nun se ne mporta
ca c' 'e straccia 'a scugliera
e vveco ca s' 'e ttira
e se schiaffea
e caparbio,
mperruso,
cucciuto,
'e ccaccia n'ata vota
e s'aiuta c' 'a capa
'e spalle
'e bracce
ch' 'e piede
e cu 'e ddenocchie
e ride
e chiagne
pecché vulesse 'o spazio pè sfucà...
Io quannno 'o sento,
specialmente 'e notte,
cumme stevo dicenno,
nun è ca dico:
" 'O mare fa paura",
ma dico:
" 'O mare sta facenno 'o mare".

Eduardo de Filippo, 1968

*tratta da "Le poesie di Eduardo" - Einaudi 1975

["Il mare fa paura". Così dice la gente guardando il mare calmo, calmo come una tavola. E dice lo stesso anche nelle giornate d'inverno quando il mare si alza, e le onde salgono prima alte come palazzi e poi come montagne. Vergine santa... risparmia i figli di mamma! - Certo, per chi si trova con un mare in tempesta e perde la vita, fa pena. E sono il primo a pensare nella mia testa: "Che brutta morte ha fatto questo pover'uomo, e che momento triste che ha passato". Ma non è morto ucciso. E' morto a mare. Il mare non uccide. Il mare è mare, e non lo sa che ti fa paura. - Io quando lo sento... specialmente di notte quando batte la scogliera e tira fuori le mani... migliaia di mani e braccia e gambe e spalle... rabbioso com'è non se ne importa che ci straccia la scogliera e vedo che le ritira e si schiaffeggia e caparbio, puntiglioso, cocciuto, le tira fuori un'altra volta e si aiuta con la testa le spalle le braccia con i piedi e con le ginocchia e ride e piange perché vorrebbe lo spazio per sfogarsi... Io quando lo sento, specialmente di notte, come stavo dicendo, non è che dico: "Il mare fa paura", ma dico: "Il mare sta facendo il mare".]